ON:id máná rivttiid komitea 

ON:id máná rivttiid komitea (OHCHR) bearráigeahččá ON:id máná rivttiid soahpamuša (SopS 59 ja 60/1991) ollašuhttima soahpamušstáhtain. Komitea šaddá gávccinuppelogi áššedovdis, geaid soahpamušstáhtat válljejit gaskavuođastis juohke njealját jagi. Guđege soahpamušstáhta sáhttá ásahit evttohan ovtta riikkavuložis. Komitea dálá sátnejođiheaddji lea Ann Marie Skelton.

Máná rivttiid komitea stivre máná rivttiid soahpamuša dulkoma ja ollašuhttima almmustahttimiin oppalaškommeanttaid. Oppalaškommeanta sáhttá guoskat dihto artihkkala dahje dihto temá. Oppalaškommeanttaid gávnnat olgeš bealde siiddus ON:id máná rivttiid komitea oppalaškommeanttat.

Komitea stivre soahpamuša dulkoma maiddái mearreáigásašraporteremiiguin. Soahpamušstáhtat raporterejit máná rivttiid ja máná buresbirgejumi dilis iežaset riikkas. Mearreáigásašraportta dahkamii oassálastet virgeoapmahaččat ja álbmotorganisašuvnnat, mat leat mánnááššiid spesialisttat. Stáhta raporttas vástida olgoáššiidministeriija, man lassin mánáidáittardeaddji, riikkabeivviid riekteáššeolmmoš ja álbmotorganisašuvnnat addet iežaset raporttas.

Vástádussan komitea addá soahpamušstáhtii čoahkkáigeasuid ja ávžžuhusaid máná rivttiid ovddideapmin jearaldatvuloš soahpamušstáhtain. Maŋimuš Suoma stáhta addán mearreáigásašraporta sihke komitea raportta vuođul addon čoahkkáigeasut ja ávžžuhusat gávdnojit olgoministeriija neahttasiidduin dahje ON:id olmmošvuoigatvuođakommišuvnna diehtovuođus- Ođđaseamos mearreáigásašraportta gieđahallan lea sirdašuvvan koronapandemiija dihtii.

Komitea gieđahallá dán áigge maiddái ovttaskas mánáid ja mánnájoavkkuid dahkan váidagiid. Váidaga mánná dahje mánnájoavku sáhttá dahkat, jus stáhta sin mielas lea loavkidan oppalašsoahpamušas dahje molssaeavttolaš beavdegirjjiin dovddastuvvon rivttiid. Komitea addá bealiváldimis ja dárbbu mielde ávžžuhusaid dutkamii váldán váidagiid vuođul.