Mánáidáittardeaddji barggut ja doaibmaváldi

Mánáidáittardeaddji lea iehčanas ja sorjjasmeahttun stáhta virgeoapmahaš, man barggu stivre láhka mánáidáittardeaddjis 1221/2004. Mánáidáittardeaddji ovddida ja árvvoštallá ON:id mánáid vuoigatvuođaid oppalašsoahpamuša ollašuhttima Suomas. Áittardeaddji bargun lea váikkuhit dasa, ahte mánáid sajádat ja vuoigatvuođat vuhtiiváldojuvvojit láhkaásaheamis ja servodatlaš mearrádusdahkamis.

Mánáidáittardeaddji barggu vuođđun lea ON:id oppalašsoahpamuš mánáid vuoigatvuođain (SopS 59-60/1991). Mánát leat buohkat vuollel 18-jahkásaččat.

Mánáidáittardeaddji barggu ja doaibmaválddi stivre lahka mánáidáittardeaddjis 1221/2004.

 

Mánáidáittardeaddji barggut

Mánáidáittardeaddji bargun lea ovttasbarggus earáiguin virgeoapmahaččaiguin sihke servošiid ja servodaga earáiguin doibmiiguin ovddidit mána ovddu ja vuoigatvuođaid ollašuvvama. Mánáidáittardeaddji barggut deattuhuvvet mánáid ovddu ja vuoigatvuođaid oppalaš dási čuovvumii ja ovddalgihtii váikkuheapmái.

Lága mielde mánáidáittardeaddji:

  • árvvoštallá máná ovddu ja vuoigatvuođaid ollašuvvama ja čuovvu mánáid ja nuoraid eallindiliid

  • čuovvu láhkaásaheami ja servodatlaš mearrádusdahkama ja árvvoštallá daid váikkuhusaid mánáid buresveadjimii

  • álgagiin, neavvuin ja rávvagiin ovddida servodatlaš mearrádusdahkama mánáid guoskevaš áššiin ja ovddida máná ovddu ollašuvvama servodagas

  • doallá oktavuođaid mánáiguin ja nuoraiguin ja gaskkusta sis ožžojuvvon dieđu mearrádusdahkamii

  • ovddida ovttasbargohámiid sierra doibmiid gaskkas

  • gaskkusta mánáid guoskevaš dieđu mánáide, mánáiguin bargiide, virgeoapmahaččaide ja eará álbmogii.

Loga lasi:

 

Mánáidáittardeaddji doaibmaváldi

Mánáidáittardeaddji doaibmaválddi regulere láhka mánáidáittardeaddjis 1221/2004. Mánáidáittardeaddji bargu lea váikkuhanbargu. Mánáidáittardeaddji váikkuha dasa, ahte mánáid sajádat ja vuoigatvuođat vuhtiiváldojuvvojit láhkaásaheamis ja servodatlaš mearrádusdahkamis.

  • Áittardeaddji ii sáhte nuppástuhttit earáid virgeoapmahaččaid mearrádusaid iige gieđahallat daid guoskevaš guoddalemiid.

  • Áittardeaddjis ii leat doaibmaváldi gieđahallat ovttaskas mánáid dahje bearrašiid áššiid.

Loga lasi mánáid ja mánnábearrašiid veahkeheaddji oassebeliin ja vuoigatvuođadorvovugiin.

 

Mo mánáidáittardeaddji váikkuha?

Mánáidáittardeaddji addá cealkámušaid ja bealiváldimiid (suomagillii) ja oassálastá ja figgá boktit servodatlaš ságastallama mánáid vuoigatvuođain.

Áittardeaddji árvvoštallá stáhtahálddahusas jođus lean prošeavttaid mánáid vuoigatvuođaid perspektiivvas ja sáhttá dahkat álgagiid dárbbašlaš nuppástusaid álggaheapmái.

Mánáidáittardeaddji almmustahttá dutkamušaid ja čielggademiid áigeguovdilis temáin.

Dehálaš vuolggasadjin mánáidáittardeaddji váikkuhanbarggus leat mánáid vásáhusat ja miellaguottut. Daid čielggadit earret eará Nuorat ráđđeaddit -deaivvademiin  ja Mánnábaromehter-dutkamušain.

Mánáidáittardeaddji doarjjan doaibmá mánáidáššiidráđđádallangoddi, masa namuhuvvojit lahtut sierra čanusjoavkkuin.

Mánáidáittardeaddji ráhkada oktavuođaid sierra doibmiid gaskii fierpmádatdeaivvademiid, sagastallandilálašvuođaid ja dáhpáhusaid vehkiin. Ovttasbargoguoimmit leat earát virgeoapmahaččat, gielddat, eanagottit, dutkit, servošat, oskkolaš servošat, fitnodagat sihke earát mánnápolitihka doaibmit ja suorggi áššedovdit.

Suoma mánáidáittardeaddji dahká deahtis ovttasbarggu Davviriikkaid mánáidáittardeddjiiguin ja Eurohpá mánáidáittardeaddjiid fierpmádagas ENOCis.

 

Mánáidáittardeaddji doaimmahat

Mánáidáittardeaddji doaimmahat lea Jyväskyläs. Hálddahuslaččat mánáidáittardeaddji doaimmahat lea vuoigatvuođaministeriija hálddahussuorggis.

Mánáidáittardeaddji doaimmahagas barget áššedovdit, geat ovddidit mánáid vuoigatvuođaid ovttasbarggus mánáidáittardeaddjin.